விபத்துப் பகுதி

செல்வாவின் ஊரருகில் அடிக்கடி விபத்து சம்பவங்கள் நடைபெற்றுக்கொண்டே இருந்தது.செல்வாவின் ஊர்க்காரர்கள் எவ்வளவோ முயற்சி செய்தும் விபத்துகள் குறைந்தபாடில்லை.

ஒருநாள் ஊர்க்கார்கள் அனைவரும் அடிக்கடி விபத்து நடக்கும் அந்த இடத்தில் கூடினர். அனைவரும் ஆலோசனை செய்து ஒரு முடிவினை எடுக்கலாம் என்று ஒவ்வொருவரும் தங்களது எண்ணங்களைத் தெரிவித்துக்கொண்டிருந்தனர்.

ஒருவர் இந்த வளைவுப்பகுதியை நேராக மாற்றினால் பெரும்பாலும் விபத்துகள் குறையும் என்றார். ஆனால் அதற்கு அதிகம் செலவாகும் என்பதால் யாரும் அவரது கருத்தினை ஏற்கவில்லை.

அங்கே நின்றுகொண்டிருந்த செல்வாவிற்கு ஒரு எண்ணம் தோன்றியது. உடனடியாக அங்கு நின்றிந்தவர்களிடம் அங்கே நடப்பட்டிருந்த அறிவிப்புப்பலகையைக் காட்டி " அத மாத்தி எழுதிட்டா விபத்து குறைஞ்சிடும் " என்றார்.

" அதுல என்ன மாத்தி எழுதுறது ? "

" விபத்துப் பகுதி , மெதுவாக செல்லவும் " அப்படின்னு இருக்கறதாலதான் எல்லோரும் வந்து இங்க விபத்து பண்ணிடறாங்க , நாம அத " இது விபத்துப் பகுதி அல்ல " அப்படின்னு எழுதிட்டா விபத்துப் பண்ணுறவங்களுக்கு இது விபத்துப் பகுதின்னு தெரியாதுல , அப்புறம் விபத்துப் பண்ண மாட்டாங்க!! , எப்படி ஐடியா ? " என்றார் பெருமை பொங்க.!